नेपाली कांग्रेसमा एकताका लागि हदैसम्म लचक हुने गगन थापा

काठमाडौँ — नेपाली कांग्रेसका सभापति गगन थापाले पार्टीको १५औँ महाधिवेशनलाई लक्षित गर्दै पार्टी एकताका लागि आफू हदैसम्म लचक हुन तयार रहेको बताएका छन्।

बिहीबार पार्टी केन्द्रीय कार्यालय सानेपामा बसेको केन्द्रीय कार्यसमितिको बैठकमा बोल्दै थापाले पार्टीभित्र रहेका आन्तरिक मतभेदलाई थाती राखेर बृहत्तर हितका लागि सबै पक्षलाई समेटेर अघि बढ्नुपर्ने बताए।

उनले अघिल्ला महाधिवेशनमा देखिएका तिक्तता र मतभेदलाई बिर्सेर आगामी महाधिवेशनलाई भव्य र सफल बनाउनुपर्नेमा जोड दिए। महाधिवेशनमा सबै नेता तथा कार्यकर्तालाई समेटेर अघि बढ्नुको विकल्प नरहेको उनको भनाइ थियो।

थापाले निवर्तमान सभापति शेरबहादुर देउवासहित सबै पक्षलाई पार्टी एकता बलियो बनाउन आवश्यक लचकता अपनाउन आग्रह गरे। कांग्रेस सबैको साझा घर भएकाले पार्टीलाई बलियो र एकताबद्ध बनाउनु सबैको दायित्व भएको उनले बताए।

उनले पार्टीको विधान र प्रक्रियाअनुसार सबैलाई अधिकार सुनिश्चित गर्दै अघि बढ्ने वातावरण बनाउन आफूहरू तयार रहेको स्पष्ट पारे।

सभापति थापाले अहिले आरोप–प्रत्यारोप गर्ने समय नभएको भन्दै संगठनलाई गतिशील बनाउने र महाधिवेशनको तयारीमा केन्द्रित हुन नेता तथा कार्यकर्तालाई आग्रह गरे।

उनका अनुसार पार्टीको बृहत्तर हितलाई केन्द्रमा राखेर सबै पक्ष एकताबद्ध भएर अघि बढ्न सके नेपाली कांग्रेसलाई आगामी दिनमा थप सुदृढ बनाउन सकिनेछ।