सुनको मूल्य तोलामा २ हजार ३०० रुपैयाँले घट्यो, चाँदी पनि सस्तियो
सुनको मूल्य तोलामा २ हजार ३०० रुपैयाँले घट्यो, चाँदी पनि सस्तियो
काठमाडौं, असोज १ । नेपाली बजारमा बिहीबार सुनचाँदीको मूल्यमा गिरावट आएको छ। नेपाल सुनचाँदी व्यवसायी महासंघका अनुसार बुधबारको तुलनामा बिहीबार छापावाल सुनको मूल्य प्रतितोला २ हजार ३०० रुपैयाँले घटेको हो।
मूल्य घटेसँगै बिहीबार छापावाल सुनको कारोबार मूल्य प्रतितोला २ लाख ९९ हजार ५०० रुपैयाँ कायम भएको छ।
चालु साता नेपाली बजारमा सुनको मूल्यमा निरन्तर उतारचढाव देखिएको छ। साताको पहिलो दिन आइतबार सुनको मूल्य १ हजार २०० रुपैयाँले बढेर प्रतितोला ३ लाख २ हजार २०० रुपैयाँ पुगेको थियो।
त्यसपछि सोमबार सुनको मूल्य १ हजार २०० रुपैयाँ र मंगलबार ९०० रुपैयाँले घटेर ३ लाख १०० रुपैयाँमा झरेको थियो। बुधबार भने सुनको मूल्य पुनः १ हजार ७०० रुपैयाँले बढेर प्रतितोला ३ लाख १ हजार ८०० रुपैयाँ पुगेको थियो।
बिहीबार पुनः २ हजार ३०० रुपैयाँको गिरावट आएपछि सुनको मूल्य प्रतितोला २ लाख ९९ हजार ५०० रुपैयाँ कायम भएको हो।
यसैगरी, चाँदीको मूल्य पनि बिहीबार घटेको छ। महासंघका अनुसार चाँदी प्रतितोला ६० रुपैयाँले घटेर ४ हजार ६२५ रुपैयाँ कायम भएको छ। बुधबार चाँदीको मूल्य प्रतितोला ८५ रुपैयाँले बढेर ४ हजार ६८५ रुपैयाँ पुगेको थियो।
साताको सुरुवातमा आइतबार चाँदीको मूल्य ६० रुपैयाँले बढेर ४ हजार ६६० रुपैयाँ पुगेको थियो। त्यसपछि सोमबार ४० रुपैयाँ र मंगलबार २० रुपैयाँले घटेको चाँदीको मूल्य बुधबार भने पुनः बढेको थियो।
सुन तथा चाँदीको मूल्यमा दैनिक हुने उतारचढावका कारण नेपाली बजारमा कारोबार मूल्य पनि प्रभावित हुँदै आएको छ।
